Án titils (Nike & Adidas)

Listaverk spegla annarsvegar listasöguna og hinsvegar samtímann.  Því hef ég eftir bestu getu sótt innblástur í listasöguna eins og í mitt nánasta umhverfi.

Hugmyndin að vinna með Nike og Adidas elti mig í tæpt ár áður en ég lét undan henni og ákvað að framkvæma nokkrar tilraunir.

Í fyrstu truflaði það mig að formin væru markaðsett sem tískuvörur og þótti mér það full mikið “popp”.  En eftir nokkrar tilraunir sá ég fagurfræðilega möguleika formanna og vann nokkur verk fyrir tvær samsýningar.

Eitt málverkið sem ég sýndi í ASI safninu á síðasta ári var unnið í anda málverkanna “Cathetra” (sem var nýlega skemmt í Steedelijk safninu í Amsterdam) og “Midnight Blue” eftir bandaríska listamanninn Barnett Newman.

Málverkið er án titils (Nike & Adidas) og er það í fyrsta skiptið sem ég læt bæði formin vinna saman í einu verki.

Í upphafi áttu litirnir að vera samskonar og Newman notaði í málverkin, en ég breytti því þegar ég sá að þeir áttu illa við formin Nike og Adidas.  Ég hélt því dökkbláum grunnlit myndanna og bætti flúrosent litum við.

Þau verk sem ég sýni hér í galleri@hlemmur.is eru afsprengi af þessu málverki þótt tilraunirnar séu annarsháttar og sjónrænt tengdari mínimalisma sjöunda áratugarins en nokkurn tíman málverka Newman.

Hvert verk er tvö málverk.  Eitt með Nike formi og annað með þrem lóðréttum línum sem er vörumerki Adidas.  Flötur hvers málverks er sniðinn til að þjóna lögun formanna og flúrosent litir í bland við hefðbundnari liti mynda samspil á milli allra verka sýningarinnar.