ALLT SEM GLITRAR ER EKKI ILLT/ALL THAT GLITTERS ISN´T EVIL

Fjöllistamaðurinn Heimir er hálfgert undrabarn. Ekki bara hvað varðar kúnst eyrans (eyrnakonfekt) heldur og ekki síður einnig kúnst augans (höggmyndir, málverk, o.s.frv.).

Ekki má þó gleyma hversu sterkur hann er í því að nýta sér kosti og eðli beggja heima þegar sá gállinn er á honum, eða ef þær aðstæður koma upp að hann þurfi sitt lítið af hverju úr hvorum heimi fyrir sig. En fjöllistamaðurinn Heimir er ekki bara hæfileikaríkur fjöllistamaður heldur einnig veraldarvanur heimsmaður, sem á heimangengt í hvaða landi heimsþorpsins sem er. Ég er því ekkert undrandi að þetta afsprengi (barn) alþjóðavæðingarinnar skuli leita sér fanga í skúmaskotum fornra og nýrra menningarafkima með þekkingarþorsta fagurkerans að vopni, því Heimir er sífellt opinn fyrir því að færa það sem við í dag köllum list, feti framar, að því sem á morgun verður þekkt sem list okkar tíma. Það skyldi því enginn ætla að það sé einhver dans á rósum að ferðast um eðli tímans með öllum hans duttlungum og tímaskekkjum og jafnvel mótað hann að sínu skapi líkt og leirkerasmiður sem situr við borð sem snýst. Handverksmaður að starfi – skífuþeytir að leik.

Listunnandinn gæti haldið að Heimir hefði dvalið langdvölum í Egyptalandi þegar hann sér hans nýjasta stykki í fyrsta sinn. Maður er eins og tekinn með valdi suður að bökkum Nílar á fljótabát. Kafteinninn hrópar “engar áhyggjur, við stoppum til að fylla okkur af gulli í hverri höfn”. Eða erum við e.t.v. stödd í heimahögum Mayaindíána suður í Mexíkó, eða jafnvel á slóðum Hrafna-Flóka austur á fjörðum og það sem ég, í fávísi minni, taldi vera píramída er í raun fagurt fjall og á toppi þess trónir annarhvor þeirra bræðra Huginn eða Muninn spúandi gulli yfir sína þakklátu þjóð, sem á hrauni byggði bú.

Niður við þjóðveginn

sjá má hinn,

sá hefur orðið fyrir voðaskoti

líkt og barn í Palestínu á CNN

aftur og aftur.

Þessi konungur spörfuglana er allur

en hinn er allur á iði

itchy trigger finger.

Aggi Egga, blaðamaður